Ky vit futbollistik mund të quhet përfundimisht një sezon me
objektiva të përfunduara për skuadrën e Shkumbinit, pasi
fitorja e skuadrës vlonjate në finalen e Kupës përballë
Tiranës, e preu edhe shpresën e fundit të bardhekaltërve
për një pjesëmarrje në kompeticionet evropiane. Jo vetëm
skuadra peqinase, por edhe rivalët e Teutës dhe Besës
ishin në pritje të përfundimit të rezultatit të këtij takimi, që
u ka mbyllur dyert për një aventurë tjetër. Tashmë Shkumbini
do të luajë tri takimet e mbetura me Tiranën, Bylisin e
Apoloninë thjesht për të respektuar kampionatin, të cilin e
nisi me objektiva pompoze, por që në fund iu desh të
ndalej në takimin gjysmëfinal të Kupës nga Flamurtari,
skuadër e cila i hoqi edhe mundësinë e fundit për në
Evropë. Tifozët peqinas, të cilët kanë bërë tifo për Tiranën
në finalen e Kupës, kanë mbetur mjaft të zhgënjyer
nga rezultati përfundimtar, pasi besonin se do të ishin
kryeqytetasit, ata që do të ngrinin këtë trofe. Gjithsesi, në
fund të takimit shumica e tyre kanë thënë fjalë të mira për
vlonjatët, duke u shprehur: “bravo u qoftë!”, ose “besuan
deri në fund!”. Tashmë që skuadra e tyre e zemrës është
jashtë çdo objektivi, të paktën presin që Shkumbini ta mbyllë
kampionatin në vendin e katërt, që gjithsesi do të ishte një
mbyllje dinjitoze. Padyshim që takimi final është ndjekur edhe
nga lojtarët bardhekaltër, të cilët edhe kanë shpresuar të ishte
Tirana fituese e trofeut. Nëse ndodhte kjo, atëherë për peqinasit
do të kishte një super-shpërblim në rast të një barazimi,
apo të një fitoreje në takimin e fundjavës ndaj bardhebluve.
Tashmë që çdo gjë në lidhje me objektivat e Shkumbinit mund
të quhet e përfunduar, do të jetë disi e vështirë për trajnerin
Magani që të gjejë motivimin e duhur në takimet e mbetura,
dukë filluar që nga përballja me Tiranën. Gjithsesi, peqinasit
kanë premtuar se deri në fund do të luajnë me dinjitet për të
respektuar kampionatin. Fatmir Ahmeti
Panoramasport